শুকুৰবাৰে লোকসেৱা ভৱনত অনুষ্ঠিত হ’ল ৰাজ্য চৰকাৰৰ গুৰুত্বপূৰ্ণ কেবিনেট বৈঠক। বৈঠকত ৰাজ্যৰ উন্নয়নৰ সৈতে জড়িত কেইবাটাও ডাঙৰ সিদ্ধান্তত অনুমোদন জনোৱা হয়। বৈঠকৰ অন্তত মুখ্যমন্ত্ৰী ড° হিমন্ত বিশ্ব শৰ্মাই সংবাদমেল সম্বোধন কৰি কেবিনেটৰ সকলো সিদ্ধান্ত ৰাজহুৱা কৰে।
এইবাৰৰ বৈঠকৰ আৰম্ভণিতে প্ৰধানমন্ত্ৰী নৰেন্দ্ৰ মোদীৰ ৰাষ্ট্ৰসেৱাৰ ২৫ বছৰ সম্পূৰ্ণ হোৱা উপলক্ষে তেওঁৰ দূৰদৰ্শী নেতৃত্ব আৰু অসমৰ বিকাশত আগবঢ়োৱা বিশেষ অৱদানৰ বিষয়ে বিশদভাৱে আলোচনা কৰা হয়।
বৈঠকৰ আটাইতকৈ চৰ্চিত সিদ্ধান্তটো আছিল ক্ৰীড়া ক্ষেত্ৰৰ সৈতে জড়িত। অসমৰ গৌৰৱ, অলিম্পিক পদক বিজয়ী বক্সাৰ লাভলীনা বৰগোহাঁইৰ নামত পলাশবাৰীত এখন অত্যাধুনিক বক্সিং একাডেমী স্থাপনৰ বাবে কেবিনেটে আনুষ্ঠানিকভাৱে সেউজ সংকেত প্ৰদান কৰে। এই একাডেমীয়ে ভৱিষ্যতে অসমৰ পৰা আৰু বহু লাভলীনা গঢ়ি তোলাত সহায় কৰিব বুলি আশা কৰা হৈছে।
